Táknin í málinu – ritmáli og myndmáli – eru margvísleg og miklu fleiri en flestir gera sér grein fyrir. Þegar grannt er skoðað er merking þeirra oft dýpri og margslungnari en ætla mætti og að baki þeim býr jafnvel árþúsunda löng saga.

Í bókinni Táknin í málinu er gerð grein fyrir merkingu, sögu og birtingarmyndum mörg hundruð tákna og tilvísanir í bókmenntir og listasverk frá ýmsum tímum notaðar til að skýra gildi þeirra, sýna hvernig þau eru notuð og varpa nýju ljósi á ýmislegt sem við héldum að við gjörþekktum.

Í bókinni er víða leitað fanga og meðal annars fjallað um liti, dýr, guðlegar verur, stjörnumerki, trúartákn, tölur, frjósemistákn, verkfæri og ótalmargt annað.

Sölvi Sveinsson hefur sent frá sér fjölmargar kennslubækur og fróðleiksrit, meðal annars um íslenska málshætti, íslensk orðtök og uppruna orða.

*****
„Verkið er skrifað á firnagóðu, skýru og einföldu máli. Tónninn er hressilegur og hugsunin hröð, merking gerð ljós í einföldum skýringum og höfundur leitar langt og skammt eftir dæmum og forsendum af mikilli þekkingu og yfirsýn. Bókin verður því sannkallaður yndislestur því snörp kaflaskil leiða lesandann á ólíkar slóðir á einni og sömu opnunni … Rit sem þetta á að geta opnað lesendum nýja sýn á táknheima, betur en gúggl og wikipedíustaut því hér er að finna íslensk og vítt samhengi í lifandi hugsun og mætti táknsins.“
Páll Baldvin Baldvinsson / Fréttatíminn