Andreas Ruud Christensen er farsæll fyrirtækisstjórnandi á fimmtugsaldri. Hann fer með eiginkonu sinni og börnum á skíði í Ölpunum, en er ekki minna upptekinn af farsímanum sínum en fjölskyldunni.

Einn daginn stoppar hann í miðri skíðabrekku til að lesa skilaboð og verður fyrir ungum manni á snjóbretti. Þegar hann vaknar úr dái eftir nokkra sólarhringa, hefur hann misst minnið að hluta til og breytingar hafa orðið á persónuleika hans. Allir vita meira um hann, en hann sjálfur.

Hann reynir að endurheimta sitt fyrra líf, en hann fjarlægist umhverfið enn meira. Það á líka við um fjölskyldu hans og því sem Andreas hefur gleymt, hefur kona hans komist að. Það hefur alvarlegar afleiðingar fyrir hann og hann hrekst frá fjölskyldu sinni, starfi og eigin persónuleika.