Sigrún Pálsdóttir er fædd í Reykjavík 1967 og ólst þar upp. Hún stundaði nám í sagnfræði við Háskóla Íslands og lauk doktorsprófi í hugmyndasögu frá Oxfordháskóla árið 2001. Hún hefur meðal annars stundað sagnfræðirannsóknir og kennslu og skrifað fjölda greina sem tengjast sagnfræði, auk þess sem hún var lengi ritstjóri Sögu, tímarits Sögufélagsins. Fyrstu bækur Sigrúnar, Þóra biskups og raunir íslenskrar embættismannastéttar og Sigrún og Friðgeir. Ferðasaga voru byggðar á sagnfræðilegum heimildum en fyrsta skáldsaga hennar, Kompa, kom út árið 2016 og Delluferðin 2019. Sigrún notfærir sér sagnfræðimenntun sína í skáldsögum sínum til að skapa réttan og trúverðugan tíðaranda og þess sjást víða merki. Bækur Sigrúnar hafa verið tilnefndar til Íslensku bókmenntaverðlaunanna, Fjöruverðlaunanna, Menningarverðlauna DV og Viðurkenningar Hagþenkis. Sigrún og Friðgeir. Ferðasaga var valin besta íslenska ævisagan 2013 af bóksölum.