Höfundur: Guðmundur Páll Ólafsson

Þar sem er líf, þar er vatn. Það er undirstaða lífsins á jörðinni og forsenda tilveru okkar. En hvað er vatn, hvaðan kemur það, hvaða hlutverki gegnir það? Er það óþrjótandi auðlind?

Í þessu glæsilega stórvirki er fjallað um vatn frá ótal hliðum. Sögusviðið er ekki aðeins Ísland, heldur er farið um gjörvallan heiminn til að sýna fram á grundvallarhlutverk vatns í þróun mannkynsins og framvindu sögunnar, mótun náttúru og lífs, umhverfis og menningar.

Fjallað er um sambúð manns og vatns, allt frá því að menn hófu í árdaga að beisla vatnið í áveitum til að auka frjósemi landsins til þess er risastíflur síðustu áratuga tóku að gjörbreyta stórfljótum heimsins og bylta þar með öllu vistkerfi vatnasvæða þeirra. Hér fléttast saman vísindaleg þekking og persónuleg viðhorf, heimspeki, skáldskapur, sagnfræði, goðsagnir og vitnisburðir frá ýmsum skeiðum sögunnar og dregin er fram heildstæð sýn á tengsl vatns og lífs.

Glæsilegar ljósmyndir setja mikinn svip á verkið og eru flestar eftir Guðmund Pál Ólafsson, teknar hér á landi og víða um heim, en aðrar eftir vini hans úr hópi bestu ljósmyndara landsins. Að auki er í bókinni fjöldi korta og skýringarmynda.

Vatnið í náttúru Íslands er lokabindið í hinni stórfenglegu ritröð Guðmundar Páls Ólafssonar náttúrufræðings og rithöfundar en bækur hans um náttúru Íslands hafa hlotið fjölda verðlauna og viðurkenninga. Hann lést áður en honum auðnaðist að leggja lokahönd á stórvirki sitt en nánustu samverkamenn hans leituðust við að ljúka verkinu í anda hans.