Hallfríður Ólafsdóttir

Hallfríður Ólafsdóttir

Hallfríður Ólafsdóttir, fædd 1964, er flautuleikari við Sinfóníuhljómsveit Íslands og leikur reglulega einleikskonserta með sinfóníuhljómsveitinni. Hallfríður er einnig kennari við Listaháskóla Íslands og Tónlistarskólann í Reykjavík og hefur lagt stund á hljómsveitarstjórn.

Hallfríður er höfundur metsölubókanna um Maxímús Músíkús sem hafa notið mikilla vinsælda hér heima og komið út í fjölda landa. Bækurnar innihalda sögur um músíkölsku músina Maxímús prýddar myndum eftir Þórarin Má Baldursson og með þeim öllum fylgir tónlist í flutningi Sinfóníuhljómsveitar Íslands. Hallfríður og Þórarinn hlutu Fjöruverðlaunin og Barnabókaverðlaun Reykjavíkurborgar fyrir Maxímús Músíkús heimsækir hljómsveitina. Verndari verkefnisins um Maxa er Vladimir Ashkenazy, Heiðursstjórnandi SÍ.

Hallfríður hlaut titilinn Bæjarlistamaður Garðabæjar árið 2003, var tilnefnd til Samfélagsverðlauna Fréttablaðsins 2010, útnefnd Eldhugi ársins 2017 og hlaut Riddarakross hinnar íslensku Fálkaorðu 2014 fyrir frumkvæði að tónlistaruppeldi æskufólks með verkefninu um Maxímús Músíkús.