Stórglæsileg þriggja binda útgáfa Sturlungu er komin út hjá Máli og menningu í nýjum búningi. Þessi útgáfa Sturlunga sögu, hin fyrsta og enn sú eina með nútímastaf­setningu kom fyrst út hjá bókaforlaginu Svörtu á hvítu fyrir ríflega tveimur áratugum, en hefur nú verið ófáanleg um árabil.

Markmið útgáfunnar var og er ekki aðeins að sýna Sturlungu þann sóma sem henni ber heldur einnig að gera hana sem aðgengilegasta nútímalesendum.  Verkið er í þremur hlutum, fyrstu tvö bindin geyma söguna sjálfa en í því þriðja „Skýringar og fræði“ er fjölbreytt ítarefni s.s. ritaskrá, kort, orðasafn og töflur og ýmiskonar skýringamyndir.

Ritstjóri útgáfunnar er Örnólfur Thorsson en ritstjórn skipuðu auk hans þau Bergljót S. Kristjánsdóttir, Bragi Halldórsson, Gísli Sigurðsson, Guðrún Ása Grímsdóttir, Guðrún Ingólfsdóttir, Jón Torfason og Sverrir Tómasson

„Kænska og stjórnmál fléttast í harðpólitískri atburðarás þar sem voldugustu ættum Sturlungaaldar er þeytt saman í blóðug átök um um það hverjir eiga Ísland. Meistaraleg frásögn, lifandi og litríkar persónur, sígildur samtímaspegill.“
Össur Skarphéðinsson utanríkisráðherra

„Sturlunga eykur skilning á mannlegu eðli og er fátt betra í skammdeginu en að lesa stórkostlegar sögur um átök vina og frænda þar sem valdagírugir höfðingjar hygla gæðingum sínum en svífast einskis við að koma höggi á andstæðinginn.“
Katrín Jakobsdóttir menntamálaráðherra

„… margslungið safn sagna, drjúg náma fróðleiks á hrífandi íslensku máli. Hún á fleiri líf en allar aðrar bækur íslenskar.“
Óskar Guðmundsson rithöfundur

„Í öllu því mannhafi sem Sturlunga greinir frá og hinni rammflóknu atburðarás má finna einhver stórbrotnustu örlög og ægilegustu fegurð samanlagðra bókmenntanna.“
Einar Kárason rithöfundur