Samúel, söguhetja samnefndar skáldsögu Mikaels Torfasonar, er auðnulaus öryrki, Íslendingur sem býr í Danmörku. Brenglaður hugur hans horfir á heiminn frá þröngum sjónarhóli, hann er utangarðsmaður í margs konar skilningi. Samúel er haldinn ofsóknaræði og botnlausum ranghugmyndum um samskipti fólks, ást og kynlíf. Vanmáttur hans á rætur í sjúku sambandi við móður og fjölskyldu. Örvæntingarfull leit Samúels að sjálfum sér, sannleikanum og guði hrekur hann út á ystu nöf.

Mikael Torfason er einn kraftmesti og frumlegasti höfundur sinnar kynslóðar. Sprengikraftur, gálgahúmor og miskunnarleysi einkenna þessa sérstæðu sögu. Viðfangsefnið er ögrandi og löngu tímabært; þjóðernishyggja, kynþáttafordómar og sjálfsmynd útlendingsins.

Er „öxull hins illa“ raunveruleg ógn eða hræðsluáróður? Er lýðræðið nasismi nútímans? Hugmyndaheimur vitfirringsins er kannski ekki svo langt frá veruleikanum þegar að er gáð.

Næsta bók Mikaels á undan, Heimsins heimskasti pabbi , var tilnefnd til Bókmenntaverðlauna Norðurlandaráðs og Menningarverðlauna DV. Samúel (2002) var tilnefnd til Íslensku bókmenntaverðlaunanna.