Riddarar hringstigans kom fyrst út árið 1982 og markaði tímamót í íslenskri skáldsagnagerð; sagan vann til verðlauna í bókmenntasamkeppni og vakti mikla athygli enda bæði frumleg og fjörug. Hún segir frá ungum dreng, Jóhanni Péturssyni, sem á heima í nýju hverfi í Reykjavík þar sem vinirnir eru riddarar í ævintýraheimi – sögutíminn er sjöundi áratugur liðinnar aldar. Jóhann segir frá uppátækjum sínum og heilabrotum af einlægni barnsins en um leið býr alvitur sögumaðurinn yfir visku og yfirsýn. Þetta er sígild þroskasaga um viðburðaríka barnæsku þar sem gleðin ræður ríkjum þar til sjálfur dauðinn knýr dyra – en frásagnarhátturinn er óvenjulegur, orðfærið einstakt og hugarflugið ómótstæðilegt.

Halldór Guðmundsson bókmenntafræðingur ritar fróðlegan eftirmála um söguna og höfund hennar.