Tveimur dögum eftir að skóla lýkur birtist amma Ólafíu Arndísar og býður henni með sér í ferðalag. Hún ætlar að þvælast um á ævafornum húsbíl og heimsækja gamla vini. Ólafíu líst hálfilla á blikuna en af því að hún fær glænýja spjaldtölvu til að skrá ferðasöguna á ákveður hún að slá til.Hér er reisubókin komin út … en þó ekki eins og amman sá hana fyrir sér!

Lesendur þekkja ólátabelginn Ólafíu Arndísi úr Flateyjarbréfunum og Dagbók Ólafíu Arndísar, en fyrir fyrri bókina hlaut Kristjana Friðbjörnsdóttir Barnabókaverðlaun menntaráðs Reykjavíkur. Reisubók Ólafíu Arndísar er sprenghlægileg saga handa krökkum á aldrinum 7–12 ára.

Margrét E. Laxness myndskreytti.

****
„Eins og í fyrri bókum nær Kristjana að fræða lesandann um sögu, landafræði og fleira án þess að eftir því sé tekið, svo vel fellur fræðslan inn í söguþráðinn. Ungir lesendur ættu að verða betur að sér eftir þennan lestur auk þess sem bókin er algjör skemmtilesning. … Eftir lestur allra þriggja bókanna er Ólafía Arndís orðin ein af mínum uppáhaldsskáldsagnapersónum. Lífleg og klár stelpa sem lifnar svo sannarlega við á blaðsíðunum. “
Ingveldur Geirsdóttir / Morgunblaðið