Loki: leiðarvísir fyrir prakkara er fyrsta bók í vinsælli ritröð sem slegið hefur í gegn erlendis. Bókin er í dagbókarstíl. Þar segir frá því þegar Loki er sendur til jarðar í formi 11 ára drengs til þess að sýna Óðni og hinum ásunum fram á að hann geti lært að hætta að gera prakkarastrik. Dagbókin er þeim töfrum gædd að hún veit hvenær Loki er að ljúga. Hann kemst því ekki upp með neitt múður! Í för til jarðar er Þór, þrumuguðinn sjálfur, hann á að þykjast vera bróðir Loka. Hinsvegar þolir Loki ekki Þór, sem er alltof góður í íþróttum og vinsæll, ólíkt Loka. Heimdallur og Hyrrokkin eru einnig send til jarðar og eiga að látast vera foreldrar Loka og Þórs.  Dagbók Loka byrjar í -3000 dyggðastigum og hann þarf að komast í +3000 dyggðastig, getur Loki það? Skemmtileg bók með rætur í menningararfinum og dillandi skemmtileg lestrarupplifun. Fyrir 9-12 ára.