Prakkarastrik jólasveinanna frá því í gamla daga þekkja allir, en vísurnar í þessu nýja kveri, Jólasveinar – af fjöllum í fellihýsi, segja frá því hvað þeir gera af sér nú til dags.

Þrettán dögum fyrir jól taka jólasveinar að tínast í bæinn, gefa börnum nammi og dót í skóinn og koma framá skemmtunum. Þeir sjást líka af og til fram á þrettándann en þá heldur sá síðasti heim. En búa þeir enn í köldum og klakafullum helli eða eru þeir fluttir í blokkaríbúð með öllum nýmóðins þægindum? Ferðast þeir um fótgangandi eða á fjórhjólum?

Magnea J. Matthíasdóttir semur þessar skemmtilegu vísur en hún hefur einna helst getið sér orð sem ötull og góður þýðandi. Ólafur Pétursson myndskreytir og tekst vel upp að fanga persónuleika jólasveinanna.