Í Íslendingum eru 200 glæsilegar ljósmyndir en ólíkt fyrri bókum Sigurgeirs fjallar hún um fólk, enda fékk hann í lið með sér hinn góðkunna ferðabókahöfund, Unni Jökulsdóttur.

Í tvö ár ferðuðust Sigurgeir og Unnur um Ísland og heimsóttu fólk í öllum landshlutum. Markmiðið var að skilja betur lífsviðhorf þeirra sem lagað hafa hefðbundin störf að nútímanum, standa á mörkum þess gamla og nýja.

Áleitnar myndir af fólki og náttúru draga fram nýja sýn á Ísland nútímans og ljóðrænar frásagnir, ríkulega blandaðar góðlátlegri kímni, færa lesendur nær viðhorfum og lífssýn trillukarla, þúsundþjalasmiða, ferðabænda, refaskyttna, tamningarmanna og náttúrubarna.

Fram stígur fjölskrúðugur hópur fólks sem tekið hefur ákvörðun um að lifa lífinu á eigin forsendum, í nálægð við það umhverfi og mannlíf sem það þekkir best og er uppspretta lífsfyllingar þess.

Þetta eru Íslendingar dagsins í dag. Bókin bregður þannig upp myndum af Íslendingum samtímans og vekur fólk jafnframt til umhugsunar um samspil náttúru og mannlífs og nýrra og gamalla hefða.

Sigurgeir Sigurjónsson er einn helsti ljósmyndari Íslendinga og eftir hann liggja fjölmargar bækur um íslenskt landslag og Íslendinga. Frá seinni árum er þekktust bókin Íslandssýn eða Lost in Iceland.

Unnur Jökulsdóttir er annar höfundur hinna kunnu ferðabóka um ævintýri Kríunnar og barnabókarinnar Eyjadís.