Konurnar á myndunum eiga það sameiginlegt að starfsheiti þeirra endar á herra, maður eða stjóri eða að þær gegna starfi sem hér áður fyrr var álitið karlmannsstarf. Ætlunin með þessu verkefni er fyrst og fremst að minna á hversu sterkt afl í íslensku atvinnulífi konur eru. En hér er einnig bent á augljósa hluti: Konur sinna alls konar störfum í dag, jafnt á við karlmenn, en samt er launamismunurinn enn sá sem hann er.

Með jákvæðni, dugnaði margra og áminningum eins og þessu verkefni vonar höfundur að stuðla megi að meira réttlæti og jafnrétti í launum og um leið að betra samfélagi.

Verkefnið er tileinkað Vigdísi Finnbogadóttur. Árið 2010 voru liðin 30 ár frá því að hún var kosin forseti íslenska lýðveldisins og þar með fyrsta konan sem var kosin forseti í almennum kosningum. Hún varð þar með fyrsti kvenforseti Evrópu og sú kona sem lengst hefur setið á forsetastóli. Vigdís skrifar formálann að bókinni og er eitt af viðfangsefnum hennar.