Eftir aldarfjórðung í Ástralíu hverfur fráskilinn miðaldra ljósmyndari aftur heim til Íslands, með líkamsleifar foreldra sinna í farteskinu og aragrúa af ljósmyndafilmum sem geyma myndir af öllum húsunum í gömlu Reykjavík – og sitthvað fleira.

Fljótlega eftir heimkomuna dregst maðurinn inn í furðulegar flækjur íslenskrar réttvísi og grátbroslega en spennandi atburðarás, enda á tímabili bæði ásakaður um kynferðisofbeldi og eiturlyfjasmygl. Leikurinn berst vítt og breitt um landið og sagan bregður upp ótal leiftrandi og minnistæðum myndum úr fortíð og nútíð sem að lokum hnitast í einum punkti.