Bókin, sem er samstarfsverkefni Eddu útgáfu og Ibby á Íslandi, geymir níu smásögur unnar út frá ótæmandi sagnabrunni norrænnar goðafræði. Höfundarnir eru átján – níu myndhöfundar og jafnmargir textahöfundar.

Verkið var unnið með þeim hætti að myndskreytarnir völdu sér efni úr goðafræðinni og myndlýstu það eftir sínu höfði. Því næst völdu þeir sér textahöfund sem tók við keflinu og skrifaði sögu út frá myndunum og frumheimildinni. Útkoman eru níu afskaplega skemmtilegar og ríkulega myndskreyttar sögur.

Fyrsta saga bókarinnar, Heil brú, segir frá Heimdalli, mæðrum hans níu og því vandaverki að gæta brúarinnar Bifrastar. Höfundar eru Björk Bjarkadóttir og Gerður Kristný

Í sögunni 2093 vinna Áslaug Jónsdóttir og Andri Snær Magnason út frá sögnum um skapanornirnar og þá örlagaþræði sem þær skapa fólki.

Halldór Baldursson og Sjón nota sagnir af miðgarðsormi og veiðiferð Þórs og jötunsins Hymis í sinni sögu sem ber heitið Blúbb!

Það kallast ögurstund nefnist saga Guðrúnar Hannesdóttur og Vilborgar Dagbjartsdóttur sem segir frá ambáttunum Fenju og Menju og kvörninni Grótta.

Mistilteinn er myndasaga eftir Ingólf Örn Björgvinsson og Emblu Ýr Bárudóttur þar sem dauði Baldurs er færður inn á ísknattleiksvöll.

Sigrún og Þórarinn Eldjárn segja frá glötuðum og endurheimtum hamar í sögunni Stanleyhamarsheimt.

Jörmun Gunnur nefnist saga Kristínar Rögnu Gunnarsdóttur og Úlfhildar Dagsdóttur þar sem unnið er út frá frásögnum af miðgarðsormi og öðrum drekum.

Í sögunni Leyniþjónusta hrafnanna og hænurnar þrjár spinna Halla Sólveig Þorgeirsdóttir og Þórunn Valdimarsdóttir sögu sem gerist í nútímanum með vísun í sagnir af örlaganornunum Urði, Verðandi og Skuld.

Að lokum vinna Þórarinn Leifsson og Auður Jónsdóttir með söguna af ferð Þórs til Útgarða-Loka í sögu sinni Sögurnar.

Heil brú er sjálfstætt framhald bókarinnar Auga Óðins sem kom út í samstarfi Eddu og Ibby árið 2003. Ritnefnd skipuðu Sólveig Ebba Ólafsdóttir, Áslaug Jónsdóttir og Sigþrúður Gunnarsdóttir.

Bók sem varpar nýju og skemmtilegu ljósi á þekktar goðsögur.