„Ég þykist vita að einhver hugsi sem svo: Það verður aldrei neitt úr þessu, þrátt fyrir að hann hringi í smið. Þetta er svona týpískt bókmenntalegt aðgerðaleysi; í lok frásagnarinnar mun ekkert hafa gerst, hann situr allan næsta vetur í stofunni, hríðskjálfandi úr kulda og horfir ásakandi augum á brotinn gluggann eins og sjálfur glugginn hafi komið í veg fyrir að eitthvað yrði gert í þessu með gluggann.“

Bragi Ólafsson hefur skrifað smásögur, skáldsögur og ljóð, auk leikrita fyrir svið og útvarp. Fyrsta smásagnasafn hans, Nöfnin á útidyrahurðinni, kom út 1996 og þremur árum síðar fyrsta skáldsagan, Hvíldardagar.

Það er ekki síst í smásögunum sem Braga tekst vel að lýsa hinu kómíska veraldarvafstri manneskjunnar og þeim hindrunum sem tungumálið setur henni – en raunar eru mörkin milli skáldskaparforma ekki alltaf augljós í verkum hans.

Dulnefnin er safn 25 sagna sem Bragi hefur sjálfur valið úr fjórum bókum sínum, útgefnum 1996–2014. Guðrún Lára Pétursdóttir bókmenntafræðingur ritar eftirmála um sögurnar.

Bragi Ólafsson er fæddur í Reykjavík árið 1962. Nýjasta skáldsaga hans, Sögumaður, kom út 2015.