Birgir Sigurðsson er eitt af fremstu leikskáldum þjóðarinnar. Dínamít sver sig í ætt við bestu verk hans. Það er hlaðið dramatískri spennu, ólgandi tilfinningum og átökum. Leikritið fjallar um Friedrich Nietzsche en hann var einn frumlegasti heimspekingur 19. aldar. Byltingarkenndar hugmyndir hans um trúarbrögð, siðferði og heimspeki hafa haft gífurleg áhrif allt fram á okkar daga. Í lífi hans voru sterkar konur, eins og hin fagra og gáfaða Lou Salome og Elísabet systir hans sem átti þátt í að afbaka hugmyndir hans svo að þær féllu að þjóðernishyggju og boðskap fasista á borð við Mussolini og Hitler. Stórbrotið og kraftmikið leikrit.