Óþrjótandi hugmyndabanki með áherslu á fjölbreytni, nýtingu og sköpunargleði í eldhúsinu. Beint í ofninn er matreiðslubók fyrir alla sem eru önnum kafnir eða vilja ekki eyða löngum tíma í eldhúsinu en langar samt að bera fram hollan og góðan mat, eldaðan frá grunni. Hér er miðað við að fólk kveiki á ofninum og hafi lokið öllum undirbúningi þegar hann er orðinn heitur. Þá þarf bara að stinga réttinum í ofninn og fara svo að huga að öðru – maturinn sér um sig sjálfur.

•  Grænmetisréttir, veganréttir, fiskur, kjúklingur og kjöt – hversdagsmatur og helgarmatur
• Allt eldað og borið fram í einu formi svo að uppþvottur og frágangur er í lágmarki
• Yfirlitsmyndir af öllu hráefninu sem notað er í hvern rétt
• Ábendingar um hvað hægt er að undirbúa og eiga tilbúið í ísskápnum
• Uppskriftir sem auðvelt er að stækka eða minnka, breyta og aðlaga
• Alls kyns fróðleikur sem hægt er að hlaupa yfir ef mann vantar bara uppskriftina
• Auðfengið og yfirleitt fremur ódýrt hráefni
• Ráð til að minnka matarsóun og nýta afganga, bæði af tilbúnum réttum og hráefni

Nanna Rögnvaldardóttir er þekkt hérlendis og erlendis fyrir skrif sín um mat og matargerð og aðgengilegar uppskriftir af öllu tagi. Hún hefur sent frá sér fjölmargar matreiðslubækur og fengið fyrir þær ýmsar viðurkenningar. Á meðal bóka hennar eru Matarást, Pottur, panna og Nanna og Maturinn hennar Nönnu.