Davíð Þór Jónsson, sóknarprestur við Laugarneskirkju í Reykjavík, hefur ort 21 trúarljóð undir dróttkvæðum hætti og birtast hér í þessari bók. Ljóðin eru ort vð 13 liði hinnar klassísku messu og í raun mætti því messa með þeim í stað hinna hefðbundnu litúrgísku texta. En fyrst og fremst eru ljóðin samin til trúarsvölunar heima í stofu, enda fæddust ljóðin í fæðingarorlofi.

Dróttkvæði hátturinn er einn sá dýrasti í íslenskri bragfræðihefð. Hann hefur þjóðlegt yfirbragð sem kveikir hughrif aldagamallar hefðar og hentar því andlegum, trúarlegum textum afar vel. Sterk hrynjandi, þétt stuðlasetning og öflugt innrím ljær orðunum ákveðinn hugleiðslublæ. Textann má því auðveldlega kyrja, enda gerir hann það nánast sjálfur í huga lesandans ef hann gefur sig honum á vald.

“Lýtalaus kveðskapur, góð guðfræði …” segir Kristján Valur Ingólfsson, f.v. vígslubiskup.