Hin skrautlega Toimi-fjölskylda býr í Tornedal, við nyrstu landamæri Finnlands og Svíþjóðar. Annie, elsta dóttirin sem býr í Stokkhólmi, verður ólétt og ákveður því að halda jólin með fjölskyldunni.

Þar bíða hennar foreldrarnir Siri, ástrík en undirokuð móðir, og Pentti, harðskeyttur óyndismaður, og systkinin ellefu sem öll eru sérstæð, til dæmis gáfnaljósið Tarom, hin umhyggjusama Helmi, Hirvo sem býr úti í skógi og talar við dýr, hinn undurfagri Valo …

En erfiðar ættarfylgjur og gamlar syndir hvíla yfir öllu og þar er beygur í Annie því hún skynjar að tími uppgjörs er í vændum.