Bókin er hin fjórða í röðinni í ritröð sem fjallar um íslenskar laxveiðiár, en áður hafa komið út bækur um Laxá í Kjós og Bugðu, Langá á Mýrum og Grímsá og Tunguá. Og núna Þverá, Kjarrá og Litlu Þverá.

Flestir eða allir veiðimenn vita, að Þverá og Kjarrá er ein og sama áin, heitir Kjarrá efst en Þverá neðst. Til að bæta á flækjustigið þá heitir hún meira að segja Örnólfsdalsá um skeið um miðbikið

Bókin er byggð upp með sama hætti og fyrri bækur. Fremst eru gamlar myndir sem tengja lesendur við gamla merkilega sögu stangaveiða í ánni. Því næst kemur ítarleg veiðistaðalýsing sem er í höndum Andrésar Eyjólfssonar frá Síðumúla, sem hefur verið yfirleiðsögumaður við ána síðustu sumur, en líklega þekkir engin þetta vatnasvæði betur en hann.

Seinni megin textakaflinn er samsafn frásagna, veiðisagna og viðtala. Er það bæði nýtt og eldra efni, sumt skráð annars staðar en endurbirt hér, annað áður óbirt. Við sögu þar koma bæði innlendir sem erlendir veiðimenn. Lokakaflinn er myndasafn eldri mynda, en þó yngri mynda heldur en bera uppi fremra myndasafnið. Þar má einnig lesa margt í sögu veiða í ánni og þekkja mörg andlit sem rituðu nafn sitt í sögu Þverár/Kjarrár.