Þorgrímur Þráinsson er einn af eftirlætisrithöfundum íslenskra barna og unglinga. Í Þriðja ísbirninum spinnur hann spennandi og eldfjöruga sögu um daginn sem þriðji ísbjörninn gengur á land og móttökunefndin samanstendur af þremur hugmyndaríkum krökkum. Stórskemmtilegt framhald af þeim atburðum sem áttu sér stað hér á landi árið 2008.

Þegar tveir ísbirnir hafa gengið á land sama sumarið hugsar fólk um fátt annað. „Ég væri til í að fá ísbjörn í afmælisgjöf,“ segir unglingurinn Karen þegar fjölskylda hennar þarf að skreppa norður í land. Síst grunar hana þó að systkini hennar þrjú, Bjössi, Lóa og Krummi, fái tækifæri til að láta þá ósk rætast.

Þorgrímur Þráinsson hefur skrifað fjölda barna- og unglingabóka, þar á meðal eina af vinsælustu bókum sem komið hafa út hér á landi, Tár, bros og takkaskór (1990). Fyrir Margt býr í myrkrinu (1997) hlaut Þorgrímur Íslensku barnabókaverðlaunin og síðustu tvær bækur hans fyrir unglinga, Svalasta 7an og Undir 4 augu, nutu fádæma vinsælda.

„Þetta er skemmtileg bók ... hún er spennandi, það eru fyndnar lausnir, það er alltaf eitthvað að gerast og hann [Þorgrímur] er góður í persónusköpun ... fjölskyldustemningin er ferlega góð í þessari bók, ég naut hennar mikið ... Ákaflega svalur ísbjörn.“
Gerður Kristný / Mannamál, Stöð 2

[Domar]

„Þriðji ísbjörninn er létt og kát saga fyrir krakka sem eru komnir vel af stað í lestri og hafa gaman af stuttum ærslasögum.“
Hildur Heimisdóttir / Fréttablaðið

„ … sagan er stutt, hæfilega fyrirsjáanleg, enn á þeim forsendum að taka sig ekki of alvarlega, og einmitt þessvegna er hún fyndin og skemmtileg og virkar vel sem dulítil fjölskylduskemmtun … Að lokum, og jafnvel síðast en allsekki síst, ber að nefna hlut mynda í bókinni, en um þær sér Halla Sólveig Þorgeirsdóttir af sinni vel þekktu snilli. Kápumyndin gefur strax tóninn og myndirnar inní bókinni eiga ríkan þátt í að skapa sögunni þann léttúðuga búning sem gerir hana vel heppnaða. Litlu bjarnarsporin sem marka þáttaskil í köflum eru ekki ofnotuð og teikna vel upp þá hárfínu línu íróníu, krúttleika og ógnar sem bókin dansar á.“
Úlfhildur Dagsdóttir / www.bokmenntir.is

[/Domar]