Pétur Gunnarsson rithöfundur var sæmdur Riddarakrossi frönsku lista- og bókmenntaorðunnar í liðinni viku. Orðuna hlaut hann fyrir ritstörf sín og þýðingar á merkum frönskum bókmenntum. Pétur hefur skrifað skáldsögur, leikrit og lagatexta og þýtt verk Flaubert, Proust og Perec. Orðan er veitt fyrir störf á sviði lista og bókmennta, og fyrir að stuðla að þekkingu á frönskum verkum.
