Álitsgjafar DV völdu bækur Braga Ólafssonar og Einars Kárasonar þegar tal þeirra barst að bestu bókakápum ársins. Um skáldsögu Braga, sem iðulega er kölluð Handritið – í styttri útgáfu titilsins, var meðal annars sagt: „Ótrúlega áreynslulaus kápa sem lætur mann þó strax langa til að kynnast innihaldinu betur.“ Um æviskáldsögu Einars, Mér er skemmt, kom fram að þar væri á ferðinni einföld og grípandi kápa, retro og skemmtileg. Í þriðja sæti listans var síðan ævisaga Guðna Th. Jóhannessonar um Gunnar Thoroddsen og í því fjórða innbundin útgáfa Missis eftir Guðberg Bergsson.
Fleiri bækur Forlagsins komust síðan á topp 10 listann, þar á meðal Blóðhófnir eftir Gerði Kristnýju, Heimanfylgja eftir Steinunni Jóhannesdóttur og Þóra biskups eftir Sigrúnu Pálsdóttur.