Aðfangadagur er genginn í garð og systkinin María og Friðrik Stálholt bíða eftirvæntingarfull eftir að bjöllur hringi inn jólin. Andrúmsloftið er þrungið tilhlökkun og allt tindrar í dásemdarlitskrúði. Meðal gjafanna sem börnin fá leynist lítill hnotubrjótur sem María tekur strax miklu ástfóstri við og fljótt kynnist hún undraverðum ævintýraheimi hans.

Hnotubrjóturinn og músakóngurinn er sannkallað jólaævintýri sem hefur á rúmum tvö hundruð árum skipað sér stóran sess í hjörtum barna og fullorðinna um heim allan. Verkið birtist fyrst á prenti í Berlín árið 1816 og hefur síðan þá verið þýtt yfir á mörg tungumál en þó aldrei komið út í íslenskri þýðingu fyrr en nú. Þetta er fyrsta prentun íslensku þýðingarinnar og jafnframt sérstök heiðursútgáfa.

Höfundur verksins, E. T. A. Hoffmann (1776–1822), er jafnan talinn einn aðalhöfunda rómantísku stefnunnar og brautryðjandi í skrifum rómantískra furðusagna en ævintýrið um hnotubrjótinn og músakónginn er með þekktari verkum hans. Það er afar nýstárlegt og óhefðbundið fyrir sinn tíma og á vissan hátt ákveðið tímamótaverk í bókmenntasögunni þar sem það eitt fyrsta rómantíska ævintýrið og hefur haft mótandi áhrif á marga aðra höfunda og listamenn.

Hulda Vigdísardóttir þýddi verkið úr upprunalegum texta Hoffmanns og sá um umbrot en bókina prýða myndir eftir Margréti Reykdal.