Orrustunni um Salajak er lokið en ekki baráttunni við vættina. Margir hafa flúið gamla heimili sitt í fjallinu til undirheimanna. Stríðsmaðurinn Ristin og vættaprinsinn Dhor hverfa inn í hyldýpi Jarmalands. Á hæla þeirra er mýgrútur hermanna, riddara og álfa undir forystu Niklis og Jöran Eck. Öll verða þau að taka á honum stóra sínum í þessum óþekkta heimi þar sem ísvindar blása og vondar verur leynast í skugganum …

Vættaveiðar gerist í Svíþjóð á fjórtándu öld og er önnur bókin af fjórum í Jarmalandskrónikunni. Fyrsta bókin, Orrustan um Salajak, kom út árið 2021. Bækurnar hafa fengið mikið lof sem æsispennandi fantasía þar sem ungar hetjur halda út í kalda og myrka veröld til að berjast við vætti, álfa og lindorma með hugprýðina eina að vopni.