Hér er skyggnst um í hinni ósýnilegu veröld erfðanna, sem þó blasir við á hverjum degi. Í fáum greinum hafa orðið viðlíka framfarir á undanförnum árum og áratugum, en jafnframt eru merkar uppgötvanir um lögmál erfða allt frá 19. öld enn í fullu gildi. Erfðafræðingar nútímans ráða yfir tækni til að rannsaka smæstu einingar erfðaefnisins, vinna með það á margvíslegan hátt og breyta því. Þannig hefur vaxið upp víðfeðm starfsemi þar sem erfða- og líftækni er hagnýtt.

Hér er veitt innsýn í þessa tækni, í hverju hún felst og hvaða möguleika hún skapar. Jafnframt er gamalgróinni og glænýrri þekkingu á erfðum og erfðafræði gerð skil. Þá er fjallað um erfðasjúkdóma, einkenni þeirra, orsakir og leit að lækningu, enda hafa uppgötvanir síðustu ára skapað nýja möguleika á sviði lyfjaframleiðslu og genalækninga.

Bókinni er ætlað að mæta sívaxandi þörf nemenda, fagfólks og sérfræðinga á ýmsum sviðum fyrir ítarlega umfjöllun um þetta efni. Tekið er mið af námskrá fyrir framhaldsskóla, en jafnframt haft í huga að bókin nýtist þeim sem lengra eru komnir í námi sem stuðningsrit. Hvers kyns myndir setja svip sinn á efnið en þær útskýra oft flókna hluti betur en mörg orð.