Strandamenn stæra sig á góðum stundum af því að kunna meira fyrir sér í göldrum en aðrir Íslendingar, ekki síst á þeim forsendum að í sýslunni urðu nokkur mögnuðustu galdramál 17. aldar, flest í Trékyllisvík en síðast í Steingrímsfirði.

Hér birtast dómar í þeim málum í fyrsta sinn á prenti í heild og sýna hugarheim og lífskjör alþýðu manna í kuldalegu ljósi ásakana um hrekki og ofsóknir, sem sakborningar tóku sjálfir mark á og notuðu sér til framdráttar í harðri lífsbaráttu.

Einnig eru hér fjölbreyttir textar um ýmis málefni sem veita innsýn í mannlíf og hugarheim Strandamanna og þá jafnframt Íslendinga allra á síðari hluta 17. aldar, ágengu og ögrandi tímabili í sögu landsins.