Ferðamál á Íslandi er fyrsta rit sinnar tegundar á íslensku; heildstætt grundvallarrit sem tekur á ferðamálum í víðu samhengi. Bókinni er skipt í þrjá meginhluta sem hver um sig endurspeglar einstök áhersluatriði sjálfbærrar þróunar; efnahag, umhverfi og samfélag.

Í hluta I er farið yfir ferðamál í tengslum við hagkerfi, skipulag og stjórnsýslu. Í hluta II er ferðamálum og málefnum umhverfisins gerð skil og í hluta III er fjallað um ferðamál og samfélag og hvernig íslensk samtímamenning tvinnast saman við ferðamál. Ferðamál á Íslandi er ætluð þeim sem hyggja á nám í ferðamálafræði á háskólastigi og eru að mennta sig í ólíkum greinum ferðaþjónustu á ýmsum skólastigum en jafnframt þeim sem hafa atvinnu af ferðaþjónustu og vilja sjá störf sín og daglegar athafnir í stærra samhengi.

Höfundarnir, Edward Hákon Huijbens, sérfræðingur hjá Rannsóknarmiðstöð ferðamála, og Gunnar Þór Jóhannesson, lektor við Líf- og umhverfisvísindadeild Háskóla Íslands, hafa báðir sinnt rannsóknum á ferðamálum um árabil.