Sæmundur fróði, Búkolla, Galdra-Loftur og Grýla eru meðal fjölmargra ógleymanlegra þjóðsagnapersóna sem hafa lifað með Íslendingum um aldir og sett mark sitt á tungumálið og þjóðarsálina. Sögurnar af þeim eru ekki aðeins gluggi að veruleika og hugmyndaheimi fyrri alda heldur lykill að undrum íslenskunnar.

Andlit á glugga er safn íslenskra þjóðsagna og ævintýra með nútímastafsetningu og ítarlegum orðskýringum. Bókin hefur að geyma sextíu sögur þar sem lýst er ástum og grimmum örlögum, heimsku og útsjónarsemi, hugrekki og hryllingi.

Sögunum er fylgt úr hlaði með fróðlegum inngangi og milliköflum þar sem varpað er ljósi á munnlega geymd efnisins, alþjóðlegt samhengi þess og gildi þessara bókmennta í menningarsögulegu samhengi. Útgáfuna önnuðust Romina Werth og Jón Karl Helgason en myndirnar í bókinni eru eftir Halldór Baldursson.