Höfundur: Jón Hilmar Jónsson

Stóra orðabókin um íslenska málnotkun er stærsta orðabók sem út hefur komið síðustu áratugi. Bókin er yfir 1600 bls. í stóru broti. Geisladiskur fylgir bókinni.

Hér er á ferð ótrúlega yfirgripsmikið verk sem veitir einstaka leiðsögn um orðaval í ræðu og riti, og gefur verkið jafnframt skýra mynd af íslenskum orðaforða og innra samhengi hans.

Stóra orðabókin sameinar í einu verki alhliða lýsingu á íslenskri málnotkun, þar sem orðin birtast í margs konar notkunarsamhengi, svo sem í orðasamböndum af ólíku tagi og samsetningum.

Bókin skiptist í tvo meginhluta, annars vegar er sjálf orðabókarlýsingin með rösklega 13.000 flettiorðum en hins vegar er sjálfstæð skrá um öll orð og orðasambönd í orðabókartextanum, um 85.000 talsins. Aftast í bókinni er svo að finna lykilorðaskrár með enskum, dönskum og þýskum samsvörunum íslensku hugtakaheitanna sem greiða erlendum notendum leið að efni bókarinnar. Bókinni fylgir einnig rafræn útgáfa á geisladiski sem býður upp á margvíslega leitarmöguleika sem ekki eru fyrir hendi í prentaðri orðabók og gefur hún nýja og fjölbreytilega innsýn í efnið.

Stóra orðabókin á að baki alllangan og nokkuð óvenjulegan aðdraganda þar sem hún á sér undanfara í tveimur orðabókum, sem höfundur hennar samdi á árabilinu 1989?2002, en íslensk málnotkun er viðfangsefni þeirra beggja, hvorrar á sinn hátt. Í kjölfar þeirra varð ljóst hvernig allt orðabókarefnið gat myndað samstæða heild og um leið orðið undirstaða og efniviður nýrrar og sjálfstæðrar orðabókar sem, auk þess að spanna allt svið fyrri bókanna tveggja, byggir á miklu nýju efni. Segja má að bókin sé niðurstaða sautján ára vinnu höfundarins.

Því markmiði sem haft var að leiðarljósi frá upphafi, að veita notendum fjölbreytilegri og greiðari aðgang að upplýsingum um íslenska málnotkun en áður höfðu verið tök á, hefur hér verið náð á glæsilegan hátt. Stóra orðabókin er verk sem er ómissandi á öllum heimilum, skólum, stofnunum og vinnustöðum og auðveldar fólki á öllum aldri að finna réttu orðin til að tjá sig, auðga orðaforðann og styrkja málkennd sína.