Guðmundur H. Garðarsson er maður nýrra tíma. Hann er afkvæmi þeirra miklu samfélagsbreytinga sem urðu við hernám Íslands og gerðist frumkvöðull á mörgum sviðum. Hann kynnti sér kornungur lífeyrismál í Bretlandi og barðist fyrir umbótum á því sviði hérlendis.

Hann var um árabil einn helsti talsmaður vestrænnar samvinnu hér á landi. Guðmundur starfaði hjá Sölumiðstöð hraðfrystihúsanna í næstum fjóra áratugi og var formaður Verslunarmannafélags Reykjavíkur í 23 ár. Hann var um tíma einn af helstu forystumönnum Alþýðusambandsins, var alþingismaður um árabil, fulltrúi í samninganefnd um útfærslu fiskveiðilögsögunnar í 200 mílur og flutti fyrstur manna frumvarp til laga á Alþingi um frelsi í fjölmiðlarekstri.

Höfundur bókarinnar er Björn Jón Bragason, lögfræðingur og sagnfræðingur. Hann leggur stund á doktorsnám. Eftir hann liggja þrjú sagnfræðirit og þá hefur hann ritað fjölda fræðigreina.