Höfundur: Milan Kundera

Jaromil er afburðabarn að mati móður sinnar, fæddur ljóðskáld og fimur teiknari. Hún gerir allt sem í hennar valdi stendur til að örva hæfileika hans. Smátt og smátt áttar Jaromil sig á því að ákveðið áhrifavald felst í hæfileikum hans, að hann getur haft áhrif á líf annarra, jafnvel þjóðfélagið.


Það eru ólgutímar í sögu tékknesku þjóðarinnar, hann langar að leggja sitt af mörkum og beita skáldagáfunni í baráttunni fyrir betri heimi, en áður er varir er skáldið gengið í lið með böðlunum og farið að klæða hryllinginn í skrautbúning ljóðrænunnar.


Leiftrandi frásagnargleði einkennir þessa sögu, hún er full af ísmeygilegum húmor en um leið er hér glímt við sígildar og áleitnar spurningar um hlutverk listamanna í þjóðfélaginu, samband móður og sonar, skáldskapar og veruleika, réttlætis og ranglætis.


Lífið er annars staðar er önnur skáldsaga eins virtasta skáldsagnahöfundar samtímans, Milans Kundera. Hún hefur notið gríðarlegra vinsælda frá því hún kom fyrst út í Frakklandi árið 1973, verið margverðlaunuð, þýdd á ein fimmtíu tungumál og telst nú meðal merkustu skáldsagna sem út hafa komið í Evrópu á síðustu áratugum.

Milan Kundera fæddist í Tékkóslóvakíu. Árið 1975 settist hann að í Frakklandi. Þetta er níunda bók Kundera sem kemur út á íslensku, en þær hafa notið fádæma vinsælda meðal lesenda hérlendis. Hinar bækur hans sem þýddar hafa verið eru skáldsögurnar Kveðjuvalsinn, Bókin um hlátur og gleymsku, Óbærilegur léttleiki tilverunnar,  Ódauðleikinn, Með hægð, Óljós mörk og Fáfræðin, auk ritgerðasafnsins List skáldsögunnar.

[Domar]

„...þetta er án efa ein besta bókin sem kemur út á Íslandi á þessu ári...“
Sigrún Sigurðardóttir / KISTAN.IS

„(Kundera) tekst að spinna frásögn um líf hans (Jaromils) þar sem tekist er á við margar grundvallarspurningar í mannlegri tilvist og samskiptum fólks og það er nákvæmlega það sem gerir Lífið er annars staðar að mjög góðri skáldsögu, eða réttara sagt alveg frábærri skáldsögu.“
Sigrún Sigurðardóttir / KISTAN.IS

„Stórbrotin bók.“

Daily Telegraph

„Tvímælalaust besta skáldsaga sem ég hef lesið í ár.“

New Statesman


[/Domar]