Ekkjufell er höfuðból að fornu og nýju. Landið liggur á miðju Fljótsdalshéraði, norðan Fljóts, og liggja vegir til allra átta. Í bókinni er gerð grein fyrir legu landsins og staðháttum auk þess sem lýst er hvernig samgöngur í upphafi 20. aldar höfðu áhrif á þróun mála. Þá er sagt frá fornminjum og þjóðsögum sem tengjast svæðinu. 
Greint er frá búsetu á Ekkjufelli og í Ekkjufellsseli eftir því sem heimildir hrökkva til. Sama ættin hefur lengi setið á Ekkjufelli. Nokkuð slitrótt frá 1674, en samfellt frá 1857 en þá hófu þar búskap Björn Sæmundsson og Aðalbjörg Guðmundsdóttir. Í lokakafla eru niðjar þeirra taldir. Indriði Gíslason er aðalhöfundur verksins en ritstjórar niðjatals eru þau Hrafnkell A. Jónsson og Solveig Brynja Grétarsdóttir.