Brandarinn eftir Milan Kundera er fyrsta bók höfundarins, kom upphaflega út í Prag 1967 og er jafnan talin í hópi merkustu bóka hans; margir segja hana þá bestu. Sagan náði strax gífurlegum vinsældum og hefur verið þýdd á fjölmörg tungumál.

Í þessari mögnuðu skáldsögu segir Kundera frá litríku fólki og rekur um leið hluta af menningarsögu Evrópu. Ungur og ástfanginn maður sendir elskunni sinni brandara á póstkorti til að ganga enn frekar í augun á henni. Kortið kemst í hendur skólafélaga þeirra og efnið spyrst út. Í því spennuþrungna andrúmslofti sem ríkir í Tékkóslóvakíu á sjöunda áratugnum verður þetta saklausa grín til þess að líf unga mannsins fer allt á annan endann. Hann missir vel launað starf og er sendur í refsivist í afskekktu héraði. Löngu síðar ætlar hann að leita hefnda en tímarnir eru gerbreyttir og hefndin snýst í höndunum á honum … Sagan er bráðfyndin hugleiðing um það hversu neyðarlega gloppótt þekking mannsins á sjálfum sér og öðrum getur verið. – Friðrik Rafnsson þýddi.

Milan Kundera fæddist í Tékkóslóvakíu árið 1929 en settist að í Frakklandi 1975. Hann hefur skrifað verk sín bæði á tékknesku og frönsku. Meðal þekktustu verka Kundera má nefna bækurnar Óbærilegur léttleiki tilverunnar, Ódauðleikinn, Bókin um hlátur og gleymsku og Kveðjuvalsinn.