Fyrir marga er það eðlilegasti hlutur í heimi að eignast barn og jafnframt helgasti tilgangur lífsins. En lífið er ekki svo einfalt og Móðir náttúra getur verið bæði miskunnarlaus og óréttlát, eins og fram kemur í þessari metsölubók Tony Parsons um drauma og veruleika þriggja systra.

Jessica þráir að eignast barn en það lætur bíða eftir sér. Getur barnlaust par verið fjölskylda?

Megan er hætt með kærastanum og eftir einnar nætur gaman með áströlskum flækingi kemst hún að því að jafnvel læknanemar eru ekki óbrigðulir í getnaðarvörnum. En ætti hún að eignast barn með manni sem hún elskar ekki?

Cat er framakona sem þráir frelsi eftir að hafa alið upp tvær yngri systur sínar. En getur kona verið fullkomlega hamingjusöm án þess að hafa nokkurn tímann upplifað það að bera barn undir belti?

Þrjár systur en bara tvær óléttar. Sex karlar og konur í vandræðum með kynlíf, ást, frjósemi – og sjálfa leitina að lífshamingjunni. Áleitin, manneskjuleg og skemmtileg saga um þau raunverulegu vandamál sem allir þurfa að glíma við eftir einn vinsælasta rithöfund Bretlandseyja.