Arnaldur Indriðason

Arnaldur Indriðason

Arnaldur Indriðason er fæddur í Reykjavík 1961. Hann nam sagnfræði við Háskóla Íslands og starfaði við blaðamennsku um hríð.

 

Fyrsta skáldsaga hans, Synir duftsins, kom út 1997 og æ síðan hefur ný saga komið frá honum á ári hverju. Fyrstu bókunum var vel tekið en segja má að hann hafi slegið í gegn, bæði heima og erlendis, með fjórðu skáldsögu sinni, Mýrinni, sem kom út árið 2000. Eftir henni var síðar gerð samnefnd kvikmynd. Allar bækur Arnaldar á þessari öld hafa orðið metsölubækur hér heima og flestar jafnframt komist á metsölulista erlendis, svo sem í Frakklandi þar sem hann nýtur gríðarlegra vinsælda.

 

Bækur Arnaldar eru glæpasögur þar sem fjallað er af næmi og skilningi um gjörðir og tilfinningar sögupersóna og þau samfélagsmein sem oft búa að baki afbrotum. Sögufléttan er jafnan traust, persónusköpun sterk og stíllinn knappur. Í bókunum eru oft dregnar upp myndir úr fortíðinni og ósjaldan liggja þræðir milli atburða í samtíð og fortíð – þekking á sögunni er mikilvægur þáttur í sagnaheimi höfundar.

 

Margar af vinsælustu sögum Arnaldar fjalla um lögreglumanninn Erlend Sveinsson og samstarfsfólk hans. Í annarri bókaröð segir frá þeim Flóvent og Thorson sem starfa saman að glæparannsóknum í Reykjavík á árum síðari heimsstyrjaldar og í þriðju röðinni er Konráð, lögreglumaður á eftirlaunum, aðalpersóna. Nokkrar bækur höfundar standa líka stakar og ótengdar öðrum.

 

Arnaldur hefur hloitið fjöldamörg verðlaun fyrir bækur sínar. Má þar nefna virt verðlaun samtaka breskra glæpasagnahöfunda, Gullrýtinginn, og norrænu glæpasagnaverðlaunin Glerlykilinn, sem hann fékk í tvígang. Einnig hefur hann hlotið þekkt bókmenntaverðlaun á Spáni, í Frakklandi margsinnis, í Svíþjóð, Finnlandi og víðar, að ógleymdum tilnefningum til ótal annarra verðlauna, þar á meðal Íslensku bókmenntaverðlaunanna. Bækur hans hafa komð út á um fjörutíu tungumálum og selst í tugmilljónatali. Enginn íslenskur höfundur nýtur meiri velgengni og vinsælda heima og heiman.